清單
感冒，真係食下藥就得？（2019年11月26日）
流感高峰期將至，大家要多多保重身體！但大家有沒有注意到，近年愈來愈多人感冒病情反覆，甚至變長期咳嗽，經年不愈？對於這個情況，我也有一些想法跟大家分享一下。
「攻城，守城」
感冒，是一種外感疾病，最基本定義為外來風、寒、熱等邪氣從皮毛、口鼻侵入的疾病，就像攻城的外敵。而人，就像是一座城堡，有着層層的防禦設施和守城軍，不斷對抗外敵，中醫經典中《傷寒論》分六經、《溫熱論》分衛氣營血，都是類近的邏輯。如果每次感冒，都能及早治療、好好保養身體，自然藥到病除，但若然每次都拖延治療、飲食生冷酸味食物，又或貪圖方便、服用不當藥物壓抑病邪，等若開門迎賊、粉飾太平，外面看來還可以，裏面則巷戰不休，時間長了，自然城破兵疲，外邪則四處潛伏，如何知道邪氣潛藏、城破兵疲？
相信大家都有聽人說過：「我每次感冒前一定會先喉嚨痛/咳嗽」、「我每次感冒就會嘔吐/肚瀉」之類說話，其實就是新的外感到來時，身體防衛較為鬆懈時，潛藏的邪氣就乘機發難，出現一些「內亂」，又或身體外在防衛早已破敗不堪，外敵直接長驅直進，侵害脾胃等臟腑。
年年月月，不斷重複這種情況，病邪一層層累積，慢慢就壓制不了，變成反覆感冒或長期咳嗽，精神、睡眠、飲食都慢慢變差，到時要痊癒，就大費周張了。所以大家新病時，一定要積極治療，直至完全康復，不留禍根；舊病已經紮根的話，更不可待慢，當然病情日久的病人，治療過程一定比較反覆及漫長，但今日不面對，將來就一定付出更大代價。
聰明的大家，以後應該知道怎樣對待這小小的感冒嗎？
何謂外感？（2020年12月14日更新）
2020年好似好少人感冒，連我自己都聽到有其他醫師講今年好似冇咩睇過人感冒，但係今年年頭到年尾，我睇病講得最多嘅就係：「外感黎嘅」，得到最多嘅回應就係：「又係外感﹖」明明冇鼻水、冇發燒、冇咳、冇痰，點解我都話係外感﹖外感同感冒有咩分別﹖我一次過係度解釋哂。
我個人的外感病定義
首先要嚟D學術嘢先，所謂「外感六淫，內生五邪」，六淫就係六種外來主要致病嘅邪氣：風、寒、暑、濕、燥、火，由於暑邪係夏天獨有、唔會內生，所以內邪只有五種，《金匱要略》指出：「客氣邪風，中人多死。千般疢難，不越三條：一者，經絡受邪，入臟腑，為內所因也；二者，四肢九竅，血脈相傳，壅塞不通，為外皮膚所中也；三者，房室、金刃、蟲獸所傷。」將疾病源頭分為三種，頭兩種係外邪分入肢體和入臟腑兩大路線，最後一種就是各種內傷、外傷，我對外感嘅認知亦由此而來，感受以風為首嘅各種外邪致病者在我而言，都係外感病。
感冒同外感有咩分別
現代醫學將「感冒」作為一個獨立嘅病嚟認知，係上呼吸道感染嘅總稱，以發燒發冷、流鼻水、咳嗽，痰、頭痛等病徵為主要症狀。在中醫而言，感冒只係某部分外感嘅其中一種發展模式嘅初始階段，即係所謂的「表證」嘅一部分，外感病就係病邪嘅入侵之旅，如走普通感冒路線，一般先入肺而流涕咳嗽，然後入裏可入脾胃而泄瀉嘔吐，又可入肝而脅痛失眠，又可入腎而腰痛等等，相同嘅病邪亦可走不同嘅路，如風寒入經絡可致頭痛落枕等、入臟腑可致咳喘胃脹等，加上各種病邪互相搭配，就衍生出無數種「又係外感」。
「治病必求於本」，病嘅來路、走勢是病本很重要嘅部分，《傷寒論》之所以為經典，就係將「傷寒」(瘟疫)呢種外感病的發展徹底分析，令後世醫者可從此了解人類嘅生理特徵，啟發醫者對不同疾病嘅醫療方法，每個病人求診時都只係整個病嘅截斷面，如果每次治病只將焦點放係一個截斷面、冇串連起整個畫面，係冇辦法真正解決問題，就會出現好多原因不明疾病、無症狀患者、同埋冇「感冒」嘅2020年。
冇「感冒」嘅2020年
用爆竊作比喻：
咁今年是甚麼一回事呢﹖點解冇咩人睇感冒呢(上星期終於多左一輪)﹖有幾個可能性：第一，大家因為疫情怕咗去醫院診所；第二，病人身體太差，外感直接跳過表證而入裏，即係所謂「直中」，簡單地比喻就係屋企度門爛咗，D賊唔使破門就直接入屋，所以聽唔到破門聲；第三，外邪由天定，今年外邪特異，行走路線與別不同，又比喻一下就係D賊識係氣窗入屋，大家淨係識圍住大門眼望望，D賊入埋睡房開夾萬都未知。
個人認為今年係第三個可能，第一，臨床加市面觀察，排除咗；第二，全香港大部分人突然統一地體質衰弱(其實有d)到會影響到外感病傳變嘅可能性比較低。至於第三，今年疫厲之氣橫行及其傳變，我好幾個月前都已經有文章探討，時至今日，由於今年不同時氣都峻烈而多變，結合起嚟令肺炎又已幾經變化，夏日夾暑，轉涼後更變化迅速，先疫厲壅塞脾胃，後又好快轉為風襲頭目，上星期再轉風寒襲表，令感冒增多，今個星期而轉襲頭項而發痙病，令頭重而頸項僵硬，等如多種不同功能入侵者輪番侵襲，相信疫情發展難以樂觀。
最後總結：我同意今年的確絕大部分時間都好少人感冒，但係外感病，多到我厭世。希望大家會睇，睇完對疾病、外感、感冒嘅概念有新嘅認知。
