受驚的心靈(15th Oct, 2020)
因為好多相熟病人對我嘅能力有信心，所以會提出一D挑戰性嘅問題/案例，最近又有一個值得分享嘅考驗出現：
某一日嘅下午，病人坐低後，我就循例問佢有咩唔舒服啦，佢就伸出佢嘅右手、同我講：
「你自己睇下。」
咁我就唯有「依脈直說」啦，講到佢最近心情比較緊張、壓力比較大，佢就講出佢最近嘅經歷：原來佢呢一個星期從事與法庭有關嘅工作，接觸到一D驚嚇程度好高嘅資訊同物件 (今時今日，法律界線去到邊，大家心裡有數，唯有曖昧D講)，之後就出現不斷失眠、發惡夢、發開口夢、精神低落、心悸同胃脹嘅情況，問我有冇解救。
好明顯佢就係嚇到心氣受損，所以心神不定，再加上精神鬱結，令肝脾氣滯，導致腸胃都脹埋，面對呢種「心虛」嘅人，傷寒名方炙甘草湯幫到你，炙甘草湯有人參、甘草、火麻仁補心脾之氣、生地、阿膠、麥冬、大棗合養陰血，生薑醒胃氣，原藥方有酒，不過呢個情況冇落酒都OK。
我再稍加疏肝脾嘅藥，4日後幾乎已經證候全消，病人當然覺得驚為天人，不過冷靜嘅我指出仲未好哂，食多3日。
之後？冇之後啦，完工！
平日又真係比較少聽到有受驚嘅病人求診 (小兒驚風﹖)，所以今次得挑戰下都幾好，可惜挑戰性太低。世事瞬息萬變，疾病亦隨時代不斷演化，無論係幾十年嘅老將定係初出茅廬嘅小兵，都會不斷遇見聞所未聞嘅情況，可以保持沉着嘅心態、柔軟嘅思考、唔好逃避、正面面對新挑戰，係我對自己嘅要求，亦係我進步嘅原動力。
#係我落筆之時又出現更大嘅挑戰啦
#希望可以變成另一篇文啦
