平日經常聽到病人講「西醫治標，中醫治本」，所以「西醫快見效，中醫就清到底」，我就唔打算討論西醫點治標啦，反而我想講嘅係「中醫治標」嘅問題：
《標本病傳論》係黃帝內經中專論標本嘅篇章，當中就有提到有兩種情況係不論標本都要優先處理，就係「中滿」（意思接近胃脹、胃口差）、「小大不利」（大小便困難或閉塞），點解呢兩點咁重要？首先我要簡單解釋一下人點先叫「健康」。
《金匱要略》提到：「若五臟元真通暢，人即安和。」即係人要健康、機能正常，最重要唔係精氣血量嘅多少，而係其流通性，就好似一間公司最重要唔係佢市值有幾多，而係佢流動資金有幾多，不論佢規模幾大，資金一旦周轉唔黎，一樣出事。
中滿和大小便小利，係中醫黎講牽涉到脾胃、大小腸、腎、膀胱、肺，係營養、水液運輸的主力，就如彌敦道於油尖旺、德輔道於中西區，一旦大塞車，如果唔先設法疏導，整區交通都會癱瘓，用我幾年前一個病人做例子：5X歲女士，長年工作壓力大，精神緊張，失眠、濕疹、關節痛、精神、體重輕，5-6日先一次大便，我開咗3日藥俾佢，只養陰通便，其他咩都唔做，3日後再覆診，大便暢通哂，大路一通，各地區循環都立即好轉，所有問題都好番7-8成，之後治療就水到渠成，如果我慢慢疏肝解鬱安神，就不知何年何月先可以撼動累積30年嘅鬱結同積滯。
香港有好多人都有不同程度的胃脹、便秘問題影響，但都習以為常，殊不知呢條消化道先係人嘅主幹線。
