fbpx

武漢肺炎 – 中醫應對Tips (二)

武漢肺炎

預防疫症小方法

由於武漢肺炎爆發,近日香港已經人心惶惶,作為醫師,我都諗咗一啲小方法,希望減少大家患病嘅機會,不過先旨聲明,以下方法都係從傳統文化同個人體驗而黎,冇經過過所謂現代科學方法驗證,大家相信就一試、不信就一笑置之啦:

1. 曬太陽
和煦嘅陽光可以為大家補充陽氣,係天然而有效嘅驅除病氣方法,所以大家,尤其女士唔好怕曬,平日盡量爭取接觸陽光(隔衫都得),長遠身體狀態已可判若雲泥。

2. 保持空氣流通
我認為近年外感病肆虐嘅其中一個原因係空氣太焗促,office、巴士、地鐵、家居好多時都係長開冷氣嘅密閉空間,令病氣困鬱,所以我建議大家在家少開冷/暖氣,多開窗戶,平日lunch hour離開office行下,放假多去郊外,呼吸多啲新鮮流動嘅空氣。

3. 飲食宜清淡
近日好多病人都有胃口差、食滯、胃脹問題,相信同心情同時氣有關,而脾胃係氣血生成之處,亦係全身氣機樞紐,一滯身體各功能都會下降,尤其臨近新年,大家食嘢請量力而為,薯仔、蕃薯、糯米、油多食物特別要少食。

4. 與外感病人保持一定距離
我唔係叫大家歧視有外感嘅人!只係即使病人有帶口罩、冇咳冇乞嚏,經驗上佢亦有機會傳染俾人,而我相信病人一般亦唔想傳染疾病,所以為雙方着想,大家不妨禮貌地行開幾步,就OK了。

5. 練習收縮肛門括約肌
呢個動作即係道家氣功所講嘅「提肛」,有活動體內氣機、固腎氣、短暫加強衛外能力嘅成效。現實中行開幾步都唔容易,有時可能仲俾人幾面夾擊添,呢個時候提肛就幫到你啦!聽落係幾搞笑,仲幾荒謬添,不過反正做咗都冇人會知、又冇害處,咪試下囉。

以上方法適用於所有外感疾病,希望對大家有幫助,當然最重要係一病就睇醫生,睇到好為止,咁先冇手尾跟!

#西營盤
#中醫診所
#中醫
#疫症
#武漢肺炎
#SARI